ക്ഷണികം

ഇപ്പോൾ
താഴെ വീണുടഞ്ഞേക്കുമെന്ന
ഭീതിയിൽ
ഇലച്ചാർത്തിനറ്റത്ത്
മഴത്തുള്ളിപോലൊരു
പ്രണയം

കാറ്റിന്റെ കൈകൾ
കൂട്ടിക്കെട്ടി കാവലിരുന്നിട്ടും
പതുങ്ങിയെത്തിയ
വെയിൽനാളം
ഒരൊറ്റ ഉമ്മയാലതിനെ
കട്ടെടുത്തു

വിരുന്നുകാരുടെ വഴി

റോഡിനിപ്പുറത്തെ മദ്യശാലയിൽ
ചില്ലുഗ്ലാസിലുടയാത്ത
സ്വർണ്ണ കുമിളകൾ നോക്കി
കവിതയുടെ പേറ്റ് നോവുമായ്
അവൻ

റോഡിനപ്പുറത്തെ പുസ്തകശാലയിൽ
തൂങ്ങി മരിച്ച പ്രണയിനികളുടെ
ചരമക്കുറിപ്പുകളുടെ
കവിതയുടെ വരികൾക്കിടയിൽ
അവൾ

അവർക്കിടയിൽ
വെറുതെ പെയ്യുന്ന മഴ,
എവിടെയോ പോകുന്ന കാറ്റ്...

എത്ര കുടിച്ചാലും വറ്റാത്ത
ദാഹമാണ് നിന്നോടുള്ള
പ്രണയമെന്ന കുറിമാനം
റോഡിനപ്പുറത്തേക്ക്
അവൾ പറത്തി വിട്ടു

അവസാന വലിയിൽ
ആദ്യ ചുംബനത്തിന്റെ
മധുരമൂറുന്ന ചിരിയോടെ
റോഡിനിപ്പുറത്ത് മൊബൈൽ
ശ്വാസം മുട്ടി മരിച്ചു

ഹണി ബീയുടെ
കടം വാങ്ങിയ ചിറകുമായ്
റോഡിനിപ്പുറത്ത് നിന്നും
ഒറ്റ പറക്കലിൽ
റോഡിനപ്പുറത്തേക്ക്

ആദ്യ സമാഗമത്തിന്റെ വിറയൽ
മഴയുടെ സമ്മാനമെന്ന്
അവളവനോടും, അവനവളോടും
കള്ളം പറഞ്ഞു

അവർക്കിടയിൽ
എന്തിനോ പെയ്യുന്ന
മഴയുടെ കുളിര്.....
എന്തോ തേടുന്ന
കാറ്റിന്റെ മൂളൽ.....

കുളിരിലെ ചെറുതീയായ്
പ്രണയത്തിന്റെ അമൃത്
നുകരാമെന്നവൻ

മഴത്തുള്ളി കാട്ടിതരാമെന്ന്
പറഞ്ഞവൾ
പൊക്കിൾ ചുഴിയിലേക്ക്
അവന്റെ വിരൽ പറിച്ച് നട്ടു

ഊഴം കാക്കാതെ
അലമാരയിൽ നിന്ന് ഭീമനായ്
എം.ടി, ദ്രൗപതിയുടെ
മുലക്കണ്ണ് കത്രിച്ചു

റെഡ് സിഗ്നൽ ഭേദിച്ച
തടികോൺട്രാക്കടരെ പുണർന്ന്
ക്ലാര പത്മരാഗം മൂളി

പതിനൊന്ന് മിനുറ്റ് പോലും
ഓടിയെത്താനാകാത്ത
പൗലോ കൊയ്ലോയുടെ
കിതപ്പുകൾക്കിടയിലേക്ക്
മിന്നൽ പിണറിന്റെ
വെള്ളിവെളിച്ചം ആഞ്ഞ് വീശി

ക്ലിക്ക്...
ക്ലിക്ക്...ക്ലിക്ക്....

ഉത്തരത്തിൽ ഒളിഞ്ഞു നോക്കുന്ന
പല്ലിയുടെ ചിലപ്പ് പോലെ,
പിന്നാലെ
പടവുകൾ ചാടിയിറങ്ങുന്ന
മെതിയടികളുടെ അട്ടഹാസങ്ങൾ...!!!

തെറിച്ച് വീണ മേഘസന്ദേശം
നൂൽ ബന്ധമില്ലാതെ തൂവലുകളായ്
പാറി പറന്നു,

അവനും
അവളും
ഇനി നമ്മളുടെ വിരുന്നുകാർ

നീലപ്പല്ലുകൾക്കിടയിലൂടെ
റോഡിനിപ്പുറത്ത് നിന്നും
റോഡിനപ്പുറത്തേക്ക്...

മാറ്റമില്ലാത്തത്

അവിടെ നീ കാണുന്ന
അസ്തമയ സൂര്യനും
ഇപ്പുറത്താണ് ഞാൻ

ഇവിടെ ഞാൻ കാണുന്ന
ഉദയസൂര്യന്റെ
അപ്പുറത്ത് നീയും

ശിശിരത്തിന്റെ
അലകൾ പുതച്ച് നീ

വെയിലിന്റെ
കുപ്പായമണിഞ്ഞ് ഞാൻ

നമുക്കിടയിലാണ്‌
പകലുകളുടെ പിറവിയും
രാത്രിയുടെ മരണവും

ചുകപ്പ്
ഒടുക്കത്തിന്റെ
നിറം മാത്രമല്ല,
തുടക്കത്തിന്റേതും
കൂടിയാണ്.....

മായൻ കലണ്ടർ പറഞ്ഞത്

പുഴ കടലിനോട് പറഞ്ഞു
തിരിച്ചൊഴുകണമെന്ന്

മല പുഴയോട് പറഞ്ഞു
ആഴങ്ങളിൽ മുങ്ങണമെന്ന്

മരം മലയോട് പറഞ്ഞു
കാറ്റിനൊപ്പം പറക്കണമെന്ന്

കാറ്റ് മേഘങ്ങളോട് പറഞ്ഞു

മഴയായ് കരയണമെന്ന്

മഴ കടലിനോട് പറഞ്ഞു
നിന്നിലേക്ക് മടങ്ങണമെന്ന്

കടൽ കരയോട് പറഞ്ഞു
പ്രളയമായ് വരുന്നുവെന്ന്

പ്രണയ കലണ്ടർ

ഏഴിനെ രണ്ടായി
പകുത്തെടുക്കാം

കറുപ്പുള്ള
അഞ്ച് ദിനങ്ങൾ
തിരക്കില്ലാത്ത
നിരത്ത് പോലെ

തലങ്ങും വിലങ്ങും
പ്രണയ വണ്ടി ഓടിക്കാം

രണ്ട് ദിനങ്ങൾ
ചുകപ്പ് കത്തിനിൽക്കുന്ന
ട്രാഫിക്ക് സിഗ്നലിൽ പോലെ
പ്രണയത്തിന് അവധി

അവിടുത്തെ
ആൺ പോലീസിനോ
ഇവിടുത്തെ
പെൺ പോലീസിനോ
പിടികൊടുക്കരുത്

ഒടുക്കത്തെ
ഫൈൻ ആയിരിക്കും

ഇങ്ങനെയും...

എം.ടി. വാസുദേവൻ നായർ
ഉണ്ണീയാർച്ചയെ
പിഴപ്പിച്ച ദിവസമാണ്
കാല് തെറ്റി വീണ
അമ്മൂമ്മ മരിച്ചത്

പച്ചയും വെള്ളയും
കൂട്ടി മുറുക്കുമ്പോൾ
ചുകപ്പായി തീരുന്ന
രസതന്ത്രം
അമ്മൂയക്കറിയില്ലായിരുന്നു

പെണ്ണുണ്ണിയാർച്ച-
ആരോമലാണെന്ന
അമ്മൂമ്മയുടെ
ജീവശാസ്ത്രത്തിൽ
ആരൊക്കെയോ
മുറുക്കി തുപ്പി

ചത്ത വടക്കൻ പാട്ടിനെ
തെക്കോട്ടെടുത്തപ്പോഴാണ്
ഞാനുമെന്റെ മച്ചുനിച്ചിയും
രണ്ട് പുഴയായ്
പിരിഞ്ഞത്......

അവൾ നിളപോലെ
വറ്റിവരണ്ട്
ചരിത്രത്തെ പിഴപ്പിച്ചതിന്
പ്രതികാരം വീട്ടി

ഏകാന്തതയുടെ തുരുത്തിൽ

നിനക്കറിയോ,
ഇന്നലെ നിലാവ്
വിരുന്ന് വന്നില്ല...

വെൺ മേഘങ്ങളുടെ
ചിത്രപ്പണികളില്ലാത്ത
വന്ധ്യയായ ആകാശവും
ചത്ത നക്ഷത്രക്കുഞ്ഞുങ്ങളുടെ
അവസാന നിശ്വാസവുമായി
വീശിയ ഉഷ്ണമുള്ള കാറ്റും
എന്നെ വിലയം ചെയ്തിരിക്കുന്നു

മഞ്ഞുതുള്ളികൾ
ഉമ്മ വെക്കുമ്പോൾ
ഇളകിയാടുന്ന
ഇലയനക്കങ്ങൾ പോലുമില്ല

വിരഹത്തിന്റെ
കയ്പുനീരുറഞ്ഞ്
മരവിച്ച നാവിൽ
നിന്റെ മാഞ്ഞുപോയ പേരുമായ്
മൗനത്തിന്റെ ആഴങ്ങളിൽ
ഞാനൊളിച്ചിരിക്കുന്നു

നിഴലിന്റെ നീണ്ട വിരലുകൾ
നോവിക്കുന്ന നാളത്തെ
പകലുകളെ ഞാൻ വെറുക്കുന്നു...